Festa e “28 Nëntorit” e njohur si dita e flamurit kombëtar është shndërruar në një biznes të paparë në diasporë, sidomos në SHBA.

Dhjetëra lokale, kryesisht restorante kanë nisur organizimin dhe reklamimin e mbrëmjeve argëtuese me këngëtarë, kryesisht ‘turbofolkut’, duke paguar mijëra dollarë dhe euro për vetëm disa orë, por duke përfituar edhe mijëra dollarë nga rezervimet dhe mysafirët. 

Aktivistë të shoqatave atdhetare në SHBA janë të shqetësuar për këtë dukuri, ku festa kombëtare është nëpërkëmbur dhe nuk ka asnjë shenjë festimi, por vetëm biznes të tmerrshëm ku derdhen dhe përfitohen mijëra dollarë. Siç mëson INA, për një këngëtar paguhet nga 10 mijë deri në 20 mijë dollarë për një apo dy mbrëmje festive. Këto festa kanë humbur karakterin human dhe të grumbullimit të fondeve për çështje humane, për mbështetjen e studentëve dhe aspekte tjera.

“Kjo që po ndodhë është një situatë që se kemi pritur.  Festa e flamurit tashmë është bërë biznes dhe nuk ka asnjë shenjë se po shënohet dita kombëtare, që dikur ishte diçka e shenjta dhe shënohej me shumë aktivitete kulturore, por edhe me elemente muzikore patriotike e atdhetare, që i ngjasonte një feste të vërtetë kombëtare. Kjo duhet të ndodhë edhe tani, e jo biznes.  Si t`ia përcjellim gjeneratës së re  këtë datë historike kombëtare. Duhet ti tregojmë në forma të tjerë festive apo kulturore. Dhe jo të dominojë kjo mënyrë e kriminalizimit dhe çmendurisë”, thekson për INA, një aktivistë i diasporës. 

Manifestimet dhe mbrëmjet e biznesit për  ‘28 Nëntorin’ tashmë masivisht po reklamohen në forma të ndryshme nëpër disa qendra  të SHBA-ve, si Nju Jork, Çikago, Nju Xhersi, por edhe në Evropë, për të tërhequr sa më shumë mysafirë dhe për të përfituar sa më shumë nga pronarë të lokaleve apo organizatorët e ndryshëm.  

Në qendër të vëmendjes janë posterë dhe fotografi me këngëtaret gjysmë-nudo që kanë pushtuar edhe rrjetet sociale dhe mediat e ndryshme.  Shoqatat atdhetare apelojnë që të ndërpritet ky trend i keqpërdorimeve dhe diaspora të bojkotojë këto evenimente që bëhen duke shfrytëzuar një datë kombëtare historike. 

ILIRIA NEWS AGENCY