Fjalë e mbajtur dje (20 prill 2016) gjatë Takimit të Asamblesë së Përgjithshme të Dhomës Amerikane të Tregtisë.

Ministre Ekonomi, Drejtor Ekzekutiv Gjoni, Anëtarë të Dhomës Amerikane të Tregtisë, zonja dhe zotërinj,

Çfarë ndryshimi sjell një vit? Që kur u mblodhëm bashkë në Sheraton vitin e kaluar, kemi një ministre të re fantastike të Ekonomisë dhe një ministër të ri të Financave, gjithashtu shumë  të mirë.  Kemi parë një reformë të suksesshme të rrjetit të shpërndarjes së energjisë elektrike. Gjithashtu kemi parë fillesën e debatueshme të fushatës kundër informalitetit.  Disa biznese kanë ardhur, e të tjera janë larguar.

Gjatë vitit të shkuar, kemi parë gjithashtu të arrestuar dhe të ndjekur penalisht gjyqtarë, prokurorë, parlamentarë, një ish-ministër dhe tani një bos të dyshuar të krimit të organizuar, Emiljano Shullazi. Ne i mirëpresim këto hapa pozitivë dhe presim që këto çështje të shkojnë përpara në mënyrë të pavarur dhe serioze.

Njëra nga çështjet që kam diskutuar me shumë prej jush ka qenë reforma në drejtësi dhe më keni thënë se pasja e një sistemi drejtësie të ndershëm e të parashikueshëm do të ketë ndikim domethënës në rritjen e bizneseve tuaja.

Investimet e huaja dhe të brendshme në Shqipëri përbëjnë vetëm një përqindje të vogël të potencialit të saj. Një reformë serioze në drejtësi do të tërheqë investime të mëdha, do të rrisë besimin e biznesit dhe do të lejojë që mosmarrëveshjet e biznesit të zgjidhen në mënyrë të parashikueshme dhe normale.

Më lejoni t’ju them shumë qartë, se jemi shumë pranë përfundimit të kësaj reforme. Shpresoj që të gjithë ju nuk do të më thoni më se jeni pesimistë për miratimin e reformës dhe që do të filloni të merrni përgjegjësi për miratimin e saj. Duhet t’u telefononi deputetëve.

Duhet të shkoni të takoni udhëheqësit e partive politike. Si lider të komunitetit tuaj, duhet të ndikoni elitat politike, sepse është e rëndësishme t’ua kujtoni politikanëve se punojnë për njerëzit.  Më shumë se 90 për qind e shqiptarëve thonë se e kërkojnë këtë reformë.  Të sigurohemi që politikanët po e dëgjojnë zërin e tyre.

Komuniteti ndërkombëtar është shprehur shumë qartë për këtë reformë, por besoj se është edhe më shumë e rëndësishme që shqiptarët ta kërkojnë këtë reformë.

Dhe kjo është vlera e organizatave si Dhoma Amerikane e Tregtisë. Ju në këtë sallë nuk jeni vetëm një zë për komunitetin e biznesit, por jeni gjithashtu një prej zërave demokratikë të shoqërisë shqiptare. Ndonjëherë qeveria do të dëgjojë, e ndonjëherë qeveria do t’ju injorojë. Por është mjaft e rëndësishme që ta ngremë zërin.

Sot po votoni për një bord të ri drejtorësh. Me 10 pozicione të hapura, zgjedhjet e sotme do të jenë të rëndësishme për të ardhmen e Dhomës. Do të doja të falënderoja të gjithë anëtarët e bordit për shërbimin e tyre ndaj Dhomës gjatë vitit të kaluar.  Nën udhëheqjen tuaj ne kemi parë hapa të mëdhenj përpara në avokatimin për të drejtat dhe privilegjet e anëtarëve tanë.

Jam i trishtuar që dy anëtarë amerikanë të bordit tonë kthehen në Shtetet e Bashkuara, por ndjehem i inkurajuar që shumë amerikanë dhe biznese amerikane po shfaqin interes për Dhomën dhe po kandidojnë për të qenë pjesë e bordit këtë mbrëmje.  Kjo tregon se Dhoma Amerikane vazhdon të jetë një zë i fuqishëm për komunitetin e biznesit amerikan në Shqipëri.

Ndaj sërish, falënderime për të gjithë ju që keni punuar kaq fort përgjatë 16 viteve të fundit për ta çuar përpara punën e Dhomës.  Pres me kënaqësi të punoj me të gjithë ju për të ndihmuar në krijimin e një mjedisi biznesi  që do t’i ndihmojë kompanitë tuaja të lulëzojnë dhe, më e rëndësishmja, ta ndihmojë Shqipërinë të arrijë potencialin ekonomik që ajo e meriton me të vërtetë.

3 Komente

Cool

Zoti Lu, nje njeri me drejtesi dhe ndjesi nuk shkon tek Sheratoni per takime, sepse duket me kilometra larg qe ajo godine eshte ngrejtur ne ate vend ku instituti i urbanistikes dhe arkitekteve te Tiranes nuk lejojne ngritje ndertesash! Pra, dallohet ashiqari qe per ngritjen e asaj ndertese ne ate vend jane paguar para nen dore! Kaq gje e dallon dhe bufi!

E dyta, ne ate vend kampion per korrupsion, ku rreth 80-90% e popullsise jane te korruptuar, eshte vertet per tu lavderuar qe jane kapur ne flagrance disa gjyqtare, prokurore, biznesmene, politikane, zyrtare gjysem te larte, etj. dhe jane gjykuar apo jane ne hetim dhe gjykim. Por kjo eshte nje shplarje sysh e lehte, per te vene serish vetveten ne gjume, ty dhe kedo tjeter.

E treta, ju shkelni ligjin kur permendni emra te sapo-arrestuar, duke i cilesuar si kriminele, pasi kjo nuk lejohet me ligj, aq me teper nga nje zyrtar, apo dipllomat, apo shtypi zyrtar, pasi mund te ndikoje ne procesin e hetimit, si duke e renduar nje te arrestuar, ashtu dhe duke e lehtesuar ate. Ky Shullazoja, qe ne emigrantet nuk i njohim e qe me ata bodigartet e vet, -sic e shohim ne shtyp- na qenka bere si Mukhadaza ne Irak, meriton nje hetim dhe gjykim sa me te pavarur. Keshtu drejtesia duhet te jete krejt e pavarur nga politika, perndryshe do te shohim ne te ardhmen vetem denime ordineresh te zakonshem dhe jo politikanesh, shume prej te cilve duket se kane lidhje me ordinere kriminele. 

Për të komentuar tek Peshku pa ujë, ju duhet të identifikoheni ose të regjistroheni (regjistrimi është falas).